Pinsehelg

Denne buketten med pinseliljer som står ved stamma til epletreet 

får vere symbolet på Pinsehelga sin nyskapande kraft. Veret denne helga har vore heller kaldt for å vere i slutten av mai, med 8 - 12 grader og ein kald norda trekk. I går 1.Pinsedag var me til Gudsteneste i kyrkja og høyrde vikarprest Ottar Berge tale over dagens tekst om Den Heilage ande. Der var også dåp og nattverd.

I dag har me vore ved Hovdevatnet på frilufts Gudsteneste. Det var prest Arne Moltubakk som hadde den. Etter Gudstenesta var det sal av kaffi/brus og kaker. Det er det trimgruppa i Hovdebygda Idretslag som står for. Det var opphaldsver,  litt kald trekk, men det var ei fin stund ved vatnet.  

17. mai

Veret var noko surt med skodde langt ned i fjella og litt regn om morgonen då eg heiste flagget. Det letna litt og slutta å regne då Barnetoget tok til å gå klokka 10, og det var opplett til fram på ettermiddagen. Me var og såg på barnetoget og etterpå var me til Gudsteneste i Kyrkja. Klokka 13 samlast me alle hos Steinar og Kristin til god middag. Me to gamle avslutta feiringa med middagen, mens dei unge for og såg på Folketoget.

Barnas vel barnehage. Sigrid og Steinar

Ådne hadde med seg både mamma og mor-mor

Arne i Ungdomsskuledelen av barnetoget

Stine er rosaruss i Mosmarka barnehage

Trimtur

Denne dagen vart den første fine vårdagen i år og eg slo plenen for Engkarsen stod klar for å blomstre. Så melde lysta seg for ein tur i skogen, og eg leita fram sko og stavar og la i veg. Skogen har såvitt fått grøne blad, serleg bjørka har kome fint siste dagane, men graset er enno lite kome. Berre kvitveisen lyser opp i skogbotnen. Eg har ei fast rute for trimturane mine og den endar oppe i fjelsida ved ei bjørk som snøen har bøygd ned. Det tar vel ein halvtime å kome ditt opp ca. 300 meter over fjorden.



På Nausen paserer eg dei gamle vårfjøsmurane. I tidlegare tider vart kyrne som var på vårbeite i utmarka tekne inn i denne fjøsen om kvelden og mjølka. Dei var i fjøsen til morgonstellet var gjort før dei vart slepte ut att. No står berre murane att og minner om ei tid som var.


Bjørka som er målet for turen, er eit tre som snøen har lagt ned. Den står omlag der som det frå gamalt av vart kalla Klimarsætra


Derfrå er det fin utsikt over Ørsta sentrum og dalen framover mot Kvandalsfjella

Konfirmasjon

Gratulere Astrid

Helga 8. og 9. mai var me i Førde og var gjester i Astrid sin konfirmasjon. Det var ei fin helg der festen starta på laurdags ettermiddag heime. Gry og Eirik hadde laga til ein fin fest med god mat og godt program. Søndag klokka 12 var me i kyrkja til Konfrmasjons Gudsteneste. Kyrkja var fullset av festkledde gjester og konfirmanter i kvite kapper. Ei høgtidleg og fin Gudsteneste.  Astrid sin konfirmasjonsfest vart avslutta med ein god og koseleg middag på Sunnfjord Folkehøgskule. Takk for at me fekk vere med på festen. 

Me budde hos Lillian og hadde det godt der.

Presentasjon av pensjonisten.

 Eg, pensjonisten er ein mann i slutten av sekstiåra, eg er gift og har 5 born Eg er no så heldig og er bestefar til 12 born, der 4 er konfirmert.                            Eg starta tidleg mitt arbeidssliv i industrien og var på same arbeidsplass til eg vart pensjonist då eg var 63 år. Mine fritidsintresser har vore det kristne barne og ungdomsarbeidet, der eg har vore med som leiar i både klubb og søndagsskule. Som pensjonist er eg med i søndagsskule og eg syng i kor, eg er også med i Y`s Men`s.

No ventar eg på at varmen skal kome så eg får plante i hagen og sette ut blomekassene att.